Географ, настаўнік-метадыст, педагог-даследчык.
Нарадзілася 5 кастрычніка 1969 года ў Віцебску.
У 1991 годзе скончыла геаграфічны факультэт Беларускага дзяржаўнага ўніверсітэта з прысваеннем кваліфікацыі «Географ. Выкладчык геаграфіі». Працавала настаўнікам геаграфіі ў ДУА «Сярэдняя школа № 17 г. Віцебска», кіравала метадычным аб’яднаннем настаўнікаў геаграфіі Чыгуначнага раёна г. Віцебска.
З 2008 працуе ў Віцебскім абласным інстытуце развіцця адукацыі, з 2019 года – начальнікам цэнтра дашкольнай, агульнай сярэдняй, спецыяльнай адукацыі і аналізу яе якасці.
Падрыхтавала больш за 17 пераможцаў рэспубліканскай, 2 пераможцаў міжнароднай алімпіяды па геаграфіі.
Двойчы станавілася лаўрэатам Спецыяльнага фонду Прэзідэнта Рэспублікі Беларусь.
Член грамадскага аб’яднання «Беларускае геаграфічнае таварыства», асацыяцыі настаўнікаў-метадыстаў Рэспублікі Беларусь «Імкненне», асацыяцыі педагогаў-даследчыкаў грамадскага аб’яднання «Беларускае педагагічнае таварыства».
Аўтар і суаўтар больш за 70 публікацый, у тым ліку вучэбных, вучэбна-метадычных дапаможнікаў, праграм факультатыўных заняткаў па вучэбным прадмеце «Геаграфія».